झापा ,दमक -२०८२/०४/०९
यतिबेला इलामको चुलाचुली गाउँपालिकाका अध्यक्ष राजेन्द्र केरुङ देशको राजधानी काठमाडौंमा  एक विशेष र उद्देश्यपूर्ण यात्रामा छन्। उनले काठमाडौंमा बसेर व्यक्तिगत स्वार्थभन्दा माथि उठी गाउँपालिकाको हितमा देशकै उच्चस्तरीय राजनीतिक नेतृत्वसँग चरणबद्ध रूपमा भेटघाट गर्दै आएका छन्। उनले आफ्नो गाउँपालिकाको विकास, स्थायीत्व र दीर्घकालीन योजना कार्यान्वयनका लागि संघीय सरकारको ध्यानाकर्षण गराएका छन्।

देउवा, प्रकाशमानदेखि कृषि राज्यमन्त्रीसम्म– उच्चस्तरीय भेटहरू

राजधानीमा रहँदा अध्यक्ष केरुङले पूर्व प्रधानमन्त्री तथा नेपाली कांग्रेसका सभापति शेरबहादुर देउवा, शहरी विकासमन्त्री प्रकाशमान सिंह, कृषि राज्यमन्त्री अरुण चौधरीजस्ता महत्वपूर्ण नेताहरूसँग विशेष भेटवार्ता गरेका छन्। ती भेटमा चुलाचुली गाउँपालिकाको समग्र विकास, बजेट फ्रीज समस्या समाधान, भूमि नापी, स्वास्थ्य सेवा विस्तार, कृषि प्रवर्द्धन, पूर्वाधार विकास, शान्ति सुरक्षा सुदृढीकरण लगायतका विषयमा विशेष छलफल भएको छ।

चुलाचुली गाउँपालिकाको चालु आर्थिक वर्ष २०८१/०८२ मा विभिन्न कारणले फ्रीज भएको बजेट पुनः सुनिश्चित गर्न अध्यक्ष केरुङले संघीय सरकारसँग कडा आग्रह गरेका छन्। उनले फ्रीज रकम सक्रिय योजनाहरूमा लगानी गर्न सकियो भने चुलाचुलीका बासिन्दाको जीवनस्तरमा ठूलो उन्नति ल्याउन सकिने विश्वास व्यक्त गरेका छन्।

उनले यो विषयमा पार्टी सभापति देउवासँग विशेष छलफल गर्दै बजेट पुनः प्राप्तिका लागि आवश्यक राजनीतिक र प्रशासनिक पहल गर्न आग्रह गरेका छन्। देउवाले पनि गाउँपालिका स्तरमा काम गरिरहेका जनप्रतिनिधिका यस्ता प्रयास सराहनीय भएको बताउँदै सहयोगको प्रतिबद्धता जनाएका छन्।

चुलाचुलीको भूमि समस्या समाधानमा ‘नापी’ प्रस्ताव

चुलाचुलीको अर्को प्रमुख समस्या भनेको भूमिसम्बन्धी विवाद हो। वर्षौंदेखि नापी नहुँदा दर्जनौं स्थानीयले सरकारी कागजविना बसोबास गरिरहेका छन्। यसले विकास निर्माण कार्यमा अवरोध पुर्‍याएको र नागरिक अधिकार सीमित बनाएको कुरा अध्यक्ष केरुङले प्रस्ट पारे। उनले संघीय सरकारसँग विशेष आग्रह गर्दै चुलाचुलीमा यथाशिघ्र नापी व्यवस्था गरिनुपर्ने माग राखेका छन्।
यसैसँगै, मालपोत कार्यालय र भू-प्रबन्धनका अन्य निकायसँग सहकार्य गरेर भूमिसम्बन्धी समस्यालाई स्थायी समाधान गर्नुपर्ने उनको भनाइ छ।

स्वास्थ्य क्षेत्रमा संरचना विस्तार र सेवा सुनिश्चितता

चुलाचुली अस्पतालमा स्वास्थ्य सामग्रीको कमी, दक्ष जनशक्ति अभाव र सेवाको गुणस्तरमा सुधार आवश्यक रहेको महसुस गर्दै अध्यक्ष केरुङले मन्त्रीहरूसँग विशेष छलफल गरेका छन्।

‘गाउँपालिकाभित्र बिरामीले सामान्य रोगको उपचारका लागि पनि सदरमुकाम वा झापातिर जानुपर्ने स्थिति अन्त्य गर्न चाहन्छौं,’ उनले मन्त्रीहरूसँग भनेका छन्। ‘यसका लागि अस्पताललाई सुविधा सम्पन्न बनाउन आवश्यक उपकरण, औषधी र विशेषज्ञ कर्मचारी व्यवस्थापनमा तपाईंहरूको सहयोग चाहिन्छ।’

चुलाचुलीको शान्ति सुरक्षा सुनिश्चित गर्न त्यहाँ रहेको प्रहरी चौकीको स्तरोन्नति अनिवार्य भएको अध्यक्ष केरुङको जोड छ। उनले प्रहरी चौकीलाई आवश्यक पूर्वाधार र जनशक्ति प्रदान गर्न संघीय गृहमन्त्रालयमार्फत पहल गर्ने तयारी गरेको बताएका छन्।

गत वर्षको SEE नतिजा सार्वजनिक भएसँगै चुलाचुलीले इलाम जिल्लामै उत्कृष्ट स्थान हासिल गरेको छ। यसले अध्यक्ष केरुङको नेतृत्वमा गरिएको शैक्षिक सुधार कार्यक्रम सफल भएको पुष्टि गर्दछ।

उनले प्रधानमन्त्रीदेखि मन्त्रीहरूलाई भने, ‘हामीले सरकारी विद्यालयहरूमा गुणस्तरीय शिक्षा प्रवाह गर्ने हाम्रो संकल्पलाई परिणामद्वारा प्रमाणित गरेका छौं। तपाईंहरूको सहयोग अझै आयो भने यो क्षेत्र नेपालकै नमूना पालिकामा परिणत हुनेछ।’

सडक, पुल र पर्यटन पूर्वाधारमा विशेष जोड,कांग्रेस र तरुण दलसँग सकारात्मक सहकार्य

चुलाचुली गाउँपालिकाको भौगोलिक संरचना, प्राकृतिक सुन्दरता र ऐतिहासिक सम्पदाको उपयोग गर्दै पर्यटन प्रवर्द्धन गर्न अध्यक्ष केरुङले योजना अघि सारेका छन्। त्यसका लागि सडक विस्तार, झोलुङ्गे पुल निर्माण, बाटोघाटा निर्माणलगायतका योजनाको विस्तृत विवरण प्रस्तुत गर्दै संघीय सरकारसँग थप बजेट माग गरिएको छ।

राजधानीमा रहँदा अध्यक्ष केरुङले नेपाल तरुण दलका केन्द्रीय अध्यक्ष बिधान गुरुङ र केन्द्रीय सदस्य सन्तोष गुरुङसँग पनि विशेष छलफल गरेका छन्। चुलाचुलीमा हुन लागेको इलाम जिल्ला स्तरीय तरुण दलको अधिवेशनका विषयमा विचार विमर्श हुँदै राजनीतिक समन्वय अझै बलियो बनाउने सहमति भएको छ।

अस्पतालमा स्वास्थ्यलाभ गर्दै पवित्रा  गिरी : अध्यक्षको कामना

काठमाडौंको KMC अस्पतालमा दुई महिनादेखि उपचाररत चुलाचुली वडा नं. ३ का नेपाली कांग्रेसका पूर्व कोषाध्यक्ष तथा समाजसेवी पवित्र गिरीको स्वास्थ्यमा केही सुधार आएको अध्यक्ष केरुङले जानकारी दिएका छन्। उनले गिरीको पूर्ण स्वास्थ्यलाभको कामना गर्दै सामाजिक सञ्जालमार्फत शुभेच्छा प्रकट गरेका छन्।

काठमाडौंमा रहँदा अध्यक्ष केरुङसँग चुलाचुलीका अन्य समाजसेवी, बुद्धिजीवी र नेताहरूले पनि भेटघाट गरेका छन्। छलफलमा सहभागीहरूमध्ये राम राना, किशोर पोखरेल, प्रकाश भण्डारी, किस्न काफ्ले, भेषराज भट्टराई, बुद्धि खनाल, बिर्ख सुहाङ, पुजन चाम्लिङ, राम हाङ्सुरुम्बा, सन्देश थुलुङ, इशान तामाङ, मिन्द्रलाल योङहाङजस्ता व्यक्तिहरू थिए।

यी सबैले आ–आफ्नो स्थानबाट चुलाचुलीको विकास र समस्या समाधानका लागि भूमिका खेल्ने प्रतिबद्धता जनाएका थिए।

‘जनता जान्न चाहन्छन्’ मा राजेन्द्र केरुङ

चर्चित टेलिभिजन कार्यक्रम ‘जनता जान्न चाहन्छन्’ मा ऋषि धमलासँग विशेष अन्तर्वार्तामा अध्यक्ष केरुङले चुलाचुलीको प्रगति, भविष्यका योजना र हालसम्मका उपलब्धिबारे जानकारी दिएका छन्। कार्यक्रममार्फत देशभरिका दर्शकले चुलाचुलीको छविलाई एक फरक दृष्टिकोणबाट हेर्न पाएका छन् उनले भने ।

राजधानीबाट गाउँसम्म सशक्त अभियान

राजेन्द्र केरुङको हालको राजधानी यात्राले केवल भेटघाटको ‘प्रोटोकल’ पूरा गरेको होइन। यो एक प्रकारको भिजनरी कुटनीतिक अभियान थियो – जहाँ एक गाउँपालिकाका अध्यक्षले गाउँको सपना बोकेर संघीय शक्ति केन्द्रसँग आँखा जुधाएका छन्।
यदि राजनीति जनताका लागि हो भने, अध्यक्ष केरुङ त्यसको एक आदर्श उदाहरण हुन् – जो राजधानीमा बस्दा पनि गाउँको माटोको गन्ध बिर्सेका छैनन्।

रिपोर्टिङ: मानुषी मिडिया हाउस प्रा. लि.,
📅 प्रकाशन मिति: २०८२ साउन ०९ गते
📍 सम्पर्क: Damak Express / NepalExpressMedia.com