दशैं–तिहार र छैठको अवसरमा चुलाचुली गाउँपालिका अध्यक्ष राजेन्द्र केरुङको शुभकामना!!
चुलाचुली गाउँपालिकाका सम्पूर्ण बासिन्दा तथा देश–विदेशमा रहनु भएका सम्पूर्ण नेपाली दाजुभाइ दिदीबहिनीहरूलाई बडा दशैं, शुभ दिपावली (तिहार) र पवित्र छैठ पर्व २०८२ सालको पावन अवसरमा हार्दिक मंगलमय शुभकामना व्यक्त गर्दछु ।
हाम्रो पुर्खाले दिएको अमूल्य सांस्कृतिक धरोहर, सामाजिक एकता र धार्मिक सहिष्णुताको अद्वितीय प्रतीक यी महान् पर्वहरू केवल उत्सव मात्र होइनन् ।
बडा दशैंले असत्यमाथि सत्यको विजय र न्यायको स्थापना गर्ने देवी दुर्गाको विजयकथा स्मरण गराउँछ भने तिहारले धन, सौन्दर्य र भाइ–बहिनीबीचको माया र सुरक्षाको अनुपम बन्धनलाई उजागर गर्छ । पूर्वी तराईको मूल जीवनशैलीसँग गाँसिएको छैठ पर्वले सूर्यदेवको आराधनाद्वारा कृषि, स्वास्थ्य र समृद्धिको कामना गर्ने हाम्रो प्राचीन वैदिक परम्परालाई जीवित राखेको छ ।
यी पर्वहरूले हामीलाई गाउँदेखि शहर, देशदेखि परदेशसम्म एउटै परम्परा र पहिचानको डोरले बाँध्छन् । आपसी सद्भाव, परिवारको पुनर्मिलन, परोपकार र मेलमिलापको सन्देश फैलाउने यी पर्व हाम्रो राष्ट्रिय एकताको आधार हुन् ।
दशैं–तिहारको समय हाम्रो आर्थिक चहलपहलको पनि महत्वपूर्ण क्षण हो । बजारको गतिविधि बढ्दै रोजगारी र आम्दानीको अवसर सिर्जना हुने यस्ता पर्वहरूले गाउँपालिकाको समृद्धिमा समेत योगदान पुर्याउँछन् ।
यस अवसरमा म सबैलाई स्वास्थ्यप्रति सचेत रहन आग्रह गर्दछु । अत्यधिक बोसोयुक्त खानेकुरा, जाँड–रक्सी, धूम्रपान वा कुनै पनि हानिकारक पदार्थको सेवनबाट टाढा रहौँ । पर्वको आनन्द आत्मअनुशासन र सन्तुलित जीवनशैलीमा मात्रै अझ मीठो हुन्छ ।
हाम्रो सभ्यता, परम्परा र साझा पहिचानको धरोहर यी महान् पर्वहरूले ल्याएको उज्यालोले हाम्रो परिवार, समाज र राष्ट्रलाई अझ समृद्ध र उज्वल बनाओस् भन्ने कामना गर्दछु ।
पुनः, दशैं, तिहार र छैठ पर्वको यस पावन अवसरमा सम्पूर्ण चुलाचुलीबासी र विश्वभर रहेका नेपाली दाजुभाइ दिदीबहिनीहरूलाई स्वास्थ्य, दीर्घायु, शान्ति र समृद्धिको हार्दिक मंगलमय शुभकामना !
शुभकामनासहित,
राजेन्द्र केरुङ
अध्यक्ष
चुलाचुली गाउँपालिका, इलाम
यो खबर पढेर तपाईलाई कस्तो महसुस भयो ?
प्रतिक्रिया
सम्बन्धित खवर
